नवी दिल्ली : दिल्लीच्या महिपालपूर परिसरात आज गुरुवारी (१३ नोव्हेंबर) सकाळी रॅडिसन हॉटेलच्या जवळ मोठ्या स्फोटासारखा आवाज ऐकू आला, ज्यामुळे परिसरात काही काळ गोंधळ निर्माण झाला. सकाळी ९ वाजून १८ मिनिटांनी अग्निशमन दलाला या घटनेची माहिती देण्यात आली. लगेच तीन अग्निशमन गाड्या घटनास्थळी पोहोचल्या.
मात्र, दिल्ली पोलिसांनी नंतर स्पष्ट केले की हा कोणताही स्फोट नव्हता, तर एक डीटीसी (DTC) बसचा मागील टायर फुटल्याने मोठा आवाज झाला. तपासादरम्यान घटनास्थळी काहीही संशयास्पद सापडले नाही. त्यामुळे नागरिकांनी घाबरण्याचे कारण नसल्याचे पोलिसांनी सांगितले आहे. परिसराची सखोल तपासणी केल्यानंतर कुठलेही विस्फोटक साहित्य किंवा संशयास्पद वस्तू आढळून आली नाही. स्फोटासारखा आवाज ऐकून आसपासच्या नागरिकांनी तत्काळ पोलिसांना फोन करून माहिती दिली होती. पोलिस आणि तपास यंत्रणांनी लगेच घटनास्थळी धाव घेतली आणि सर्व भाग सुरक्षित असल्याची खात्री केली.
