वृत्तसंस्था : जम्मू आणि काश्मीर पोलिसांनी एका मोठ्या दहशतवादी कटाचा पर्दाफाश केला आहे. दोन दिवसांपूर्वी अटक करण्यात आलेल्या डॉ. आदिल अहमद याने दिलेल्या माहितीवरून पोलिसांनी कारवाई करत हरियाणातील फरिदाबाद येथून ३०० किलो आरडीएक्स, एक एके-४७ रायफल आणि मोठ्या प्रमाणात दारूगोळा जप्त केला.
मिळालेल्या अधिक माहितीनुसार, ९ नोव्हेंबर रोजी एका मोठ्या कारवाईदरम्यान श्रीनगर पोलिसांनी अनंतनाग येथील सरकारी वैद्यकीय महाविद्यालय (जीएमसी) येथील माजी डॉक्टर आदिल अहमद यांच्या लॉकरमधून एके-४७ रायफल जप्त केली. त्यानंतर, पोलिसांनी त्या डॉक्टरला अटक केली आणि त्याची कडक चौकशी सुरू केली. तेव्हा आदिल अहमदने एका मोठ्या कटाचा पर्दाफाश करत एक टीप दिली. पोलिसांनी आदिलच्या टीपवरुन फरिदाबाद येथून ३०० किलो आरडीएक्स जप्त केलं. याप्रकरणी मिळालेल्या अधिक माहितीनुसार, आदिल अहमद हा अनंतनागमध्ये वरिष्ठ निवासी डॉक्टर म्हणून काम करत होता. पण, जम्मू-काश्मीर पोलिसांना त्याच्या लॉकरमधून एके-४७ रायफल सापडली. त्यानंतर त्याचे दहशतवादी संघटना जैशशी संबंध असल्याचा संशय सुरक्षा यंत्रणांना आला. पोलिसांनी या प्रकरणाचा अधिक तपास केला. जैशशी संबंधाच्या संशयावरुन जेव्हा या संपूर्ण प्रकरणाची चौकशी करण्यात आली, तेव्हा फरिदाबाद येथील डॉक्टरच्या निवासस्थानी मोठ्या प्रमाणात आरडीएक्स असल्याची माहिती पोलिसांना मिळाली. याप्रकरणी सूत्रांनी दिलेल्या माहितीनुसार, डॉ. आदिल अहमद याने चौकशीदरम्यान अनेक धक्कादायक खुलासे केले आहेत.
