रत्नागिरी : पुण्यात हगवणे कुटुंबियांकडून सुनेचा छळ केल्याची घटना ताजी असतानाच आता कोकणात गुहागर येथे आणखी एक धक्कादायक प्रकार समोर आला आहे. सासर्यानेच सुनेसोबत अश्लील वर्तन करत शरीरसुखाची मागणी केल्याने खळबळ उडाली आहे. रत्नागिरी जिल्ह्यातील गुहागर तालुक्यात हा प्रकार समोर आला आहे. पती मुंबईत असताना सासऱ्याकडून २१ वर्षीय विवाहितेसोबत अश्लील वर्तन करण्यात आले. गुहागर तालुक्याच्या ग्रामीण भागातील या धक्कादायक प्रकरणात सासरा विजय याच्या विरोधात गुन्हा दाखल करण्यात आला आहे.
राष्ट्रवादी काँग्रेस पक्षाच्या प्रदेश प्रवक्त्या अॅड. सायली दळवी यांनी गुहागर पोलीस ठाण्यात महिला आघाडीचे रौद्ररूप दाखवल्यानंतर त्या पीडित महिलेचा पुरवणी जबाब घेऊन आवश्यक गुन्हा दाखल करण्यात आला. आता त्या पीडित महिलेला न्याय मिळेल अशी अपेक्षा व्यक्त करण्यात येत आहे.
गुहागर येथील ग्रामीण भागातील पूर्वी एमआयडीसी मंजूर असलेल्या एका गाव परिसरात धक्कदायक प्रकार समोर आला आहे. सासऱ्याकडून अवघ्या २१ वर्षीय सूनेचा विनयभंग करण्यात आला. वर्षभर सासऱ्याकडून होणाऱ्या विनयभंगाला कंटाळून सुनेने सासऱ्यासह त्यांना पाठीशी घालणाऱ्या सासू व नणंद यांच्याविरोधात गुहागर पोलीस ठाण्यात तक्रार केल्याने गुहागर तालुक्यातील ग्रामीण भागातील परिसरात एकच खळबळ उडाली आहे.
तक्रारीनुसार, आरोपी सासऱ्याचे अश्लील वर्तन गेल्या काही दिवसांपासून सुरू होते. कुटुंबीयांच्या हस्तक्षेपाने यापूर्वी एक बैठक घेऊन आरोपीकडून माफीनामा लिहून घेतला गेला होता. मात्र तरी त्याच्या वागणुकीत कोणताही फरक पडलेला नाही. या तक्रारीत सुनेने म्हटले आहे की, आम्ही पतीसह सासरे विजय, सासू व नणंद असे एकत्र कुटुंबात राहतो. माझे लग्न २८ एप्रिल २०२४ रोजी हिंदू रितीरीवाजाने झाले. पती त्यावेळी हॉटेल मॅनेजमेंटचे शिक्षण घेत होते. सासऱ्याचे दोन जनरल स्टोअर्स असून यातील एक जनरल स्टोअर्स नणंद तर दुसरे स्टोअर्स हे आमच्या घरातूनच सासरे चालवितात. जून २०२४ पासून सासरे विजय यांच्याकडून माझा विनयभंग केला जात आहे.
संबंधित महिलेने गुहागर पोलिस स्थानकात दिलेल्या तक्रारीवरून पोलिसांनी आरोपी सासऱ्याविरोधात विनयभंगाचा गुन्हा दाखल केला आहे. अश्लील वर्तन करुन लज्जास्पद बोलणे, शरीरसुखाची मागणी करणे असे प्रकार सातत्याने सुरु असल्याचे तिने सांगितले. सातत्याने घडणारे हे प्रकार मी पती व कुटुंबियांच्या कानावर घालायचे मात्र, समजुतीने ते मिटविण्यात येत होते. मात्र १९ मे २०२५ रोजी पती कामानिमित्त मुंबईला गेल्यावर सकाळी ७ वाजताच्या सुमारास सासरे विजय यांनी अश्लीलतेने वागून विनयभंग केला. याला कंटाळून मी पती यांच्याकडे मुंबईला निघून गेले. यानंतर माझ्या आई-वडिलांकडे हा प्रकार पुन्हा सांगून व त्यांच्याशी चर्चा करुन पोलीस ठाण्यात तक्रार दाखल केली असल्याचे यामध्ये तक्रार अर्जात म्हटले आहे. गुहागर पोलीस ठाण्यात सासरा, सासू व नणंद यांच्याविरोधात भारतीय न्यायसंहिता ७४, ७८ (२), ७९, ३५१(२), ३५२, ३ (५) अधिनियमानुसार, गुन्हा दाखल करण्यात आला आहे. पुढील तपास गुहागर पोलीस करत आहेत.
