नागपूर : विधान परिषदेचे सभापती म्हणून आज प्रा. राम शिंदे यांची निवड करण्यात आली आहे. काल विधान परिषद सभापती पदी अर्ज करण्यासाठी शेवटची तारीख होती. विरोधकांकडून कोणीही अर्ज न दाखल केल्याने आज शिंदे यांची एकमताने निवड करण्यात आली आहे. याची घोषणा आज विधान परिषदेच्या उपसभापती निलम गोऱ्हे यांनी आज त्याची अधिकृत घोषणा केली. ७ जुलै २०२२ रोजी रामराजे निंबाळकर यांचा कार्यकाळ समाप्त झाला. त्यापासून विधान परिषदेचे सभापतीपद रिक्त आहे. राज्य मंत्रिमंडळाचा शपथविधी झाला असला तरी अद्यापही खातेवाटप झालेले नाही. शिवसेना शिंदे गटाकडून काही महत्वांच्या पदांची मागणी करण्यात आली होती. त्यात विधान परिषदेच्या सभापतीचा देखील समावेश होता. मात्र भाजपकडून राम शिंदे यांच्या नावाची घोषणा केली.
विधानपरिषेदेचे गणित बघायचे झाल्यास भाजपचे सर्वाधिक सदस्य आहेत. त्यामुळे भाजपने शिंदे यांचे नाव लावून धरले. राज्यपालांना पाठविलेल्या कार्यक्रमानुसार बुधवारी १२ वाजेपर्यंत अर्ज दाखल करणे आवश्यक आहे. त्यानंतर १२.०५ वाजता प्रस्तावांची छाननी होणार आहे. उमेदवारी जाहीर झाल्यानंतर राम शिंदे यांनी पंतप्रधान नरेंद्र मोदी, अमित शाह, जे.पी. नड्डा आणि राज्याचे मुख्यमंत्री देवेंद्र फडणवीस आणि उपमुख्यमंत्री अजित पवार आणि एकनाथ शिंदे यांचे आभार मानले आहे.
