नवीदिल्ली प्रतिनिधी : न्यायमूर्ती यू. यू. लळीत यांनी आज देशाचे सरन्यायाधीश म्हणून शपथ घेतली. राष्ट्रपती द्रौपदी मुर्मू यांनी त्यांना सरन्यायाधीशपदाची शपथ दिली. राष्ट्रपती भवनात शपथविधी कार्यक्रमाचे आयोजन करण्यात आले होते. न्यायमूर्ती लळीत हे भारताचे ४९ वे सरन्यायाधीश बनले आहेत. या शपथविधी सोहळ्यास उपराष्ट्रपती जगदीप धनखर, पंतप्रधान नरेंद्र मोदी आणि इतर अनेक केंद्रीय मंत्री उपस्थित होते.
नवे सरन्यायाधीश न्या. उदय लळीत यांचा कार्यकाळ तीन महिन्यांपेक्षाही कमी असणार आहे. ८ नोव्हेंबर रोजी ते निवृत्त होणार आहेत. या दरम्यान महाराष्ट्रातील सत्तासंघर्षासह इतर महत्त्वांच्या प्रकरणांचा निकाल लागणार का याकडे सगळ्यांच लक्ष लागलं आहे. “प्रत्येक प्रकरणांच्या यादीत पारदर्शकता आणण्याचा माझा प्रयत्न असेल. तसेच तातडीची प्रकरणे संबंधित खंडपीठांसमोर मुक्तपणे मांडता येतील यासाठी प्रयत्न करणार असून वर्षभर चालेल, असे एक घटनापीठ बनवण्याची इच्छा त्यांनी वयक्त केली.
न्या. लळीत यांचा जन्म ९ नोव्हेंबर १९५७ रोजी सोलापूरमध्ये झाला. न्यायमूर्ती लळीत यांच्या घराण्यात वकिली पिढीजात चालत आलेली आहे. ललित यांचे आजोबा रंगनाथ ललित हे स्वातंत्र्यापूर्वी सोलापुरात वकील होते. न्यायमूर्ती यू यू ललित यांचे ९० वर्षीय वडील उमेश रंगनाथ ललित हे देखील व्यावसायिक वकील आहेत. नंतर त्यांनी उच्च न्यायालयाचे न्यायाधीश म्हणून काम पाहिले. याशिवाय न्यायमूर्ती ललित यांना हर्षद आणि श्रेयश ही दोन मुले असून त्यांनी अभियांत्रिकीचे शिक्षण घेतले आहे. मात्र, नंतर श्रेयश ललितने कायद्याचे शिक्षण घेतले आहे. त्यांची पत्नी रवीनाही वकील आहे.